Владыко Господи Боже отец наших, Тя просим, Тебе ся мили деем, яко же бе изволил еси Сам взыти со угодником Твоим Моисеом, возводя люди Твоя Израильтяны из Египта в землю обетования, такоже и ныне Сам иди с рабом Твоим сим(имярек), и с вои сими, храня их день и нощь. Якоже бе укрепил Iсуса Навина образом Крестным, и молитвою Моисеовою на Амалика, и царства ханааньска секущася с ними. Якоже бе помогл Гедеону с тремя сты, прогонящу мадиамско множество, и секущу Зива и Зевея и Салмона, и вся князи их, такоже и сим помози. Якоже бе пособил по Константине первом царе христианом, явлением небесных победити противныя сопостаты Твоя, победу им дая на ня, знаменая одесную и ошуюю, спреди и созади, защитением Креста Честнаго, во Имя Тебе Бога и Отца, и Господа нашего Iсуса Христа, и Пречестнаго и Животворящаго Духа Твоего, ныне и присно и во веки веком. Аминь.

  наш адрес: 191014, г. Санкт-Петербург, а-я 8
   e-mail: