| |
ЧИН, КАКО ПРИИМАТИ ПОДОБАЕТ
К ПРАВОСЛАВНЕЙ ВЕРЕ ОТ ЕРЕСИ СЕРГИЯНСКИЯ ПРИХОДЯЩИХ
Подобает убо от ереси сергиянския приступающу християнствовати, преже явити, и обличити всяко еретическо начинание, и отсюду показати, яко от всея души и сердца, и веры истинныя християнствовати восхоте, и отрицатися убо яве в церкви всякаго еретическаго служения, и проклинати же вся примысленныя, кроме мысли Божия, начинания и обычаи; и тако ся сочетовати Христу Богу и Церкви Православней.
Первее убо от святителя, или от онаго власть имущаго, преже всего каяйся опасно да истязан будет в членах его заблужения. Таже да обличит я. Посем в наказании и вере православней да научит и утвердит его.
Свершив же известно испытание и наказание, да идет с ним к церкви, и да поставит его пред дверми церковными от вне.
Святитель же одеян в епитрахиль и омофор и митру, имея в шуйце жезл свой пастырский, на своей кафедре сядет (аще же иерей, во епитрахили и фелони станет в церковных дверех); и повелев к православней вере обращающемуся колена преклонити, вопрошает его, глаголя:
Хощеши ли отрещися заблуждения еретическаго и всех неправостей его?
Он же отвещает: Хощу.
Святитель же вопрошает: Хощеши ли быти и жити в соединении веры православно кафолическия?
Он же отвещает: Хощу.
Таже глаголет приемлемый или восприемник его, аще есть отроча:
Аз, имярек , иже от сергиянския ереси днесь прихожду ко истинному, православному християнския непорочныя веры закону, преданному от святых Апостол и утверженному богоносными Отцы, святых и великих всея вселенныя, святых седми соборов. Прихожду же не за насильство некое, или убийство, или от нужди некия, или беды, или тесноты, или страха, или налога, или нищеты, или ради долга, или убожества, или некоей вещи на мя подвизаемой, или чести ради мирския, и благодарований неких, и богатьства, и стяжаний неких, обещаваемых некими, или всякаго некоего ради прибытка, или лестию, или лицемерием, или за распрю, или любопрение к некоему от единоверных моих, или яко хотя отсюду отмстити православным християном, яко ревнитель убо ереси сергиянския, но от всея душа и сердца чиста и неблазнена, Христа любящи, и Того истинныя непорочныя веры, животнаго закона желая получити.
Святитель же востав, знаменует его десницею, глаголя:
Во имя Отца, и Сына, и Святаго Духа, аминь.
Посем глаголет святитель к приходящему:
Обратися к западу, и истинно от всего сердца твоего отрицайся всех заблуждений еретических, и исповеди православно кафолическую веру.
Он же обращься к западу, руце простерты от себе держит. Святитель же вопрошает его:
Отрицаешилися всех заблуждений сергиянских еретических, и яко Богу и истине Его противных и душепагубных сущих отметаешилися?
Он же отвещает:
Отрицаюся всех заблуждений сергиянских еретических, и яко Богу и истине Его противных и душепагубных сущих отметаюся.
Таже глаголет приемлемый:
Отрицаюся богомерзкия ереси сергиянския, еже есть антихристовой богоборней власти служение и почитание ея, яко законной и от Бога поставленной по благой воли Его, и исполнение всех велений ея, иже к разрушению и попранию Церкве Христовы чинимых.
Святитель вопрошает его:
Отрицаешилися всех еретических сергиянских соборищ, преданий же, уставов, и всех учителей и учений их, Церкви святой православновосточной противных и отметаешилися их?
Он же отвещает:
Отрицаюся и отметаюся их.
Еще же отрицаюся пребезумнаго учения сергиянскаго, утверждающаго, яко лестию некоею привнесенною, страха ради убивающых тело, подобает Церковь Христову спасати. Творящыя убо сия земное устроение Церкви соблюдати тщатся, истины же Христовы отметаются. Сего ради отрицаюся и проклинаю начинание сие льстивое и вся, яже от сергиян ереси, и ересеначальники их: Сергия, Алексия, Пимена, Никодима, Алексия Ридигера и вся прочыя сергианцы.
Еще же отрицаюся всякаго безбожнаго обычая и содомскаго греха, ихже сергияне употребляют и иных обучают.
Таже глаголет приемлемый:
Такожде проклинаю хулящих святую и истинную православную Церковь и учащих, яко она исчезоша, и мнящих, яко единство Церкви видимо существует токмо по усмотрению безбожныя власти.
Проклинаю и тех, иже святость Церкви почитают в отступлении и единении с неверием.
Проклинаю и тех, иже мнят яко лжа возмогоша преложитися в истину.
Проклинаю и тех, иже соборность церкви зрят в злом господстве отступник и нечестивец и единении сих с толпой.
Проклинаю и тех, иже апостольскую Церковь заменяша невоизмышленныя от богоборец сообщество, не держащаго предания.
Проклинаю и тех, иже познах истину, противляхуся ей.
Проклинаю и тех, иже Церковь мнят в жестоком обществе от безбожныя власти управляему.
Проклинаю и тех, иже сию безбожную власть мнят властию, от Бога данной.
Проклинаю и тех, иже имут общение с сими еретики, или пособствуют им, или защищают их ересь сергиянства, мняще ю спасение Церкви от богохульниц.
Святитель вопрошает:
Отрицаешилися к сим нынешних всех и древлих отступничеств, ересей же ересиархов, и яко Богу и истине Его противных сущих отметаешилися?
Он же отвещает:
Всех древлих и нынешних отступничеств, ересей же и ересиархов, яко богопротивных сущых отметаюся.
Такожде проклинаю учащых, яко еретицы и расколницы имут единаго во благодати Отца Бога, а не токмо истинно рожденныя от Него водою и Духом во святем крещении.
Проклинаю и тех, иже мнят, яко вера православная суть разновидность заблуждений, и яко человецы не способны познати и хранити богооткровенную истину.
Проклинаю и тех, иже учат, яко Церковь Христова разделися сама в себе на ветви, яже разнятся своим учением и жизнию.
Проклинаю и тех, иже утверждают Церковь не сущу видимо быти на земли, но яко от разрозненных ветвей соединитися имать во едино тело.
Проклинаю и тех, иже мнят, яко православнии християне имут некия вины в отпадении от Церкви еретиков и схизматиков.
Проклинаю и тех, иже не различают истиннаго священства и таинств Церкве от еретических и раскольнических, но учат, яко вся сквернодействия их имут благодать Духа Святаго и довлеют для спасения.
Проклинаю и тех, иже скверное лжекрещение еретиков и схизматиков почитают вступлением в Церковь.
Проклинаю и тех, иже глаголют, яко еретицы и раскольницы соблюдоша преемство от Апостол.
Проклинаю и тех, иже имут молитвенное или евхаристическое общение с еретики и схизматики, или позволяют им действовати что-либо яко служителем Церкви.
Проклинаю и тех, иже пособствуют им, или защищают их новую ересь икуменизма, мняще ю братскую любовь и единение разрозненных християн быти.
Аще приходящий от ереси сергиянския прежде к русския зарубежныя церкви притек, такожде глаголет и сицевые проклятия:
Такожде проклинаю новых отступников от российския Церкве влекомых, отметающых свою Матерь Церкву, сиречь катакомбную Церковь истинных православных християн, и приимшых в общение самозванец и соглядатай безбожия, ся глаголющих быти истинно православныя.
Проклинаю и тех, иже хулят и отвергают вся тайныя соборы истинныя православныя Церкве, вменяху оныя аки не бывши.
Проклинаю и тех, иже студно любодействуют со богоотступники сергияны и рекуще синагогу сатанину матерь церковь.
Проклинаю и все сонмище сие, от поместныя российския Церкви влекомо, сиречь карловчане русския зарубежныя церкве, еже приях вся богохульства, отступничества, зломудрие, лжу, предательства, всякие ереси и свою ересь полусергиян, и всех иже имут общение с сей, защищают и пособствуют, от разных мнений.
Обращшуся же ему к востоком, святитель глаголет к нему:
Отреклся ли еси всех заблуждений еретических?
Он же отвещает: Отрекохся.
Святитель вопрошает:
Желаеши ли соединитися православновосточной Церкви?
Он же отвещает:
Желаю от всего моего сердца.
Таже глаголет:
Отрицаяйся сергиянских всех привнесенных, сочетаваюся истинному Богу и единому Христу; и верую во Отца, и Сына, и Святаго Духа, Святую Единосущную и Нераздельную Троицу. Священных ангел, и святых всех, праотцев, и пророков; и апостол, и мучеников, и исповедников, и учителей церковных, и преподобных, и такожде и святых царственных новомучеников, и всех новых мучеников и исповедников российских, от безбожныя антихристовы власти законно пострадавших, и всех, иже Христу Богу благоугодивших, яко верных рабов Его, почитаю и благоговею, за еже ко оному честь: и воистину от всея души и сердца, и произволения истиннаго християнствовати хощу.
Аще же с лицемерием и лестию сия глаголю, и не от веры истинныя и вседушевнаго сердца, но яко ся притворяяй православный христианин быти, последи же восхощу ся отрицати, и к сергиянстей ереси ся обратити паки, или ся обрящу с сими еретики спразднствуяй, или трапезы разделяяй, или пособствуяй им отай, или в еретическия их храмины на молитвы приходяй, или ся преклоняяй, и еретическо их лжесвященство за истинное священство почитаяй, а не наипаче яве обличаяй я и их деяния, и отметаяй суетную веру их, и служение, буди мне анафема, в будущем же веце душа моя да сочтется с сатаною и лукавыми бесы во огни неугасимем, и тьме кромешней.
Святитель же вопрошает:
Веруеши ли во Единаго Бога в Троице Святей славимаго и покланяемаго, Отца и Сына, и Святаго Духа, и покланяешилися Ему, яко Царю и Богу?
Он же отвещает:
Верую во Единаго Бога в Троице славимаго и покланяемаго, Отца и Сына, и Святаго Духа, и яко Царю и Богу покланяюся.
И абие творит поклонение едино до земли, и чтет Символ Веры:
Верую во Единаго Бога Отца Вседержителя:
Святитель, возложив руку на главу его, глаголет молитву сию:
Диакону рекшу: Господу помолимся. Клир: Господи помилуй.
О имени Твоем, Господи Боже истинный, и Единороднаго Ти Сына, и Святаго Ти Духа, возлагаю руку мою на раба Твоего (рабу Твою), имярек, сподобльшагося (сподобльшуюся) прибегнути ко святей православней Твоей Церкви, и под кровом ея сохранену быти. Отстави от него (нея) еретическу ону прелесть, и исполни его (ея), еже в Тя веры, надежди, и любве, яко да разумеет закон Твой истинный и правую веру. Даждь ему (ей) во всех заповедех Твоих ходити, и угодная Тебе творити и сохранити; яко аще сотворит та человек, жив будет в них. Напиши его (ю) в книги животныя, совокупи его (ю) стаду наследия Твоего, да прославится имя Твое святое о нем (ней) и возлюбленнаго Ти Сына, Господа нашего Исуса Христа, и Животворящаго Ти Духа. Да будут очи Твои призирающи нань (на ню) милостивне всегда, и уши Твои, еже послушати гласа моления его (ея); возвесели его (ю) в делех руку его (ея), и во всем роде его, яко да исповестьтися покланяяся, и славя имя Твое великое и вышнее, и восхвалит Тя всегда, во вся дни живота своего.
Возглашение: Тебе бо поют вся силы небесныя, и Твое есть царство и сила и слава, Отца и Сына и Святаго Духа, ныне и присно и во веки веком.
Клир: Аминь.
Изрек сия, поставит его святитель пред налоем, идеже святое Евангелие и Крест Христов положени суть; клир же чтет псалом 66-й:
Боже ущедри ны, и благослови ны, просвети лице Твое на ны и помилуй ны. Познати на земли путь Твой, во всех языцех спасение Твое. Да исповедятся Тебе людие Боже, да исповедятся Тебе людие вси. Да возвеселятся и возрадуются языцы, яко судиши людем правотою, и языки на земли наставиши. Да исповедятся Тебе людие Боже, да исповедятся Тебе людие вси. Земля даде плод свой. Благослови ны Боже, Боже наш. Благослови ны Боже, и да убоятся Его вси концы земли.
По скончании же псалма повелевает ему святитель колена пред святым Евангелием преклонити. Сему же бывшу, глаголет святитель стихи сия:
Посли Дух Твой, и созиждутся, и обновиши лице земли.
Обратися Господи, доколе; и умолен буди на раба Твоего.
Будут стропотная в правая, и острая в пути гладки.
Спаси раба Твоего, Боже мой, уповающаго на Тя.
Буди ему Господи, столп крепости от лица вражия.
Ничтоже да успеет враг на него, и сын беззакония да не приложит озлобити его.
Господи, услыши молитву мою, и вопль мой к Тебе да приидет.
По сих же абие диакон глаголет: Господу помолимся. Клир: Господи помилуй.
Святитель же чтет со всяким умилением молитву сию:
Господи Боже Вседержителю, едине Святе, и во святых почиваяй, великия ради и неизчетныя Твоея к человеком любве, согрешающым различныя образы покаяния всегда предлагайя, и заблудшым от истины в путь правый к познанию Тебе единаго истиннаго в Троице славимаго и покланяемаго Бога показуяй, во еже ни единому от них погибнути, но всем спастися, и в разум истины приити. Благодарим Тя, славим и величаем, яко и ныне сему словесному созданию Твоему, имярек, возсиял еси в сердце его свет познания истины Твоея, и ко святей Твоей апостольской православно кафолической Церкви прибегнути сподобил еси его. Возсияй убо, Владыко, смиренно молим Тя, совершенно в сердце его свет благодати Святаго Твоего Духа к просвещению разума истины святаго Евангелия Твоего: даждь ему нелицемерно, невозвратно, и нелестно соединитися святей Твоей соборней Церкви; истинно же прияти и исповедати православно кафолическую веру; сопричти его избранному Твоему стаду, и соедини его телу Церкви Твоея святыя; сотвори его сосуд честен, и жилище Святаго Твоего Духа; яко да тем всегда окормляем и наставляем, спасительныя заповеди Твоя соблюдет, и творя волю Твою благую, благоугодную же и совершенную, сподобится и восприятия небесных Твоих благих со всеми благоугодившими Тебе.
Возглашение: Ты бо еси Бог милости и щедрот, и человеколюбия, и всем человеком хощеши спастися, и Тебе славу возсылаем Отцу, и Сыну, и Святому Духу, ныне и присно, и во веки веком.
Клир: Аминь.
По молитве же святитель повелевает ему востати, глаголя:
Востани и стани добре: стани со страхом.
Он же востав, глаголет:
Ныне приступая к спасительному лону катакомбныя Церкве истинных православных християн, обещаюся быти верным чадом ея, согласным со всем ея учением и правилами, и обязуюся от всея души моея и сердца пребывати даже до кончины живота моего в истинном и нелицемернем послушании ея каноническому священноначалию и пастырем, законно избранным, пребывающым в согласии с православною верою и благочестием. Никогда же не дерзну доносити на пастырей и братий моих пред мучители и служители безбожия. Сию истинную православную веру, юже ныне добровольно исповедую, и истинно содержу, туюжде целу и невредиму, даже до конечнаго моего издыхания твердо, Богу помогающу, содержати и исповедати, и оную учити и проповедати, елико мощно будет, и должности ея радетельно и с радостию исполняти, тщатися буду, соблюдая в добродетели и непорочности сердце мое. И во уверение сего моего истиннаго и чистосердечнаго исповедания, лобызаю словеса и крест Спасителя моего. Аминь.
Посем святитель подает ему к лобызанию святое Евангелие и Крест. По лобызании же глаголет:
Благословен Бог, хотяй всем человеком спастися и в разум истины приити, сый благословен во веки.
Клир:
Аминь.
 наш адрес:
191014, г. Санкт-Петербург, а-я 8
e-mail:
Текстовое меню
Об издании/ Катакомбная
Церковь/ Экклезиология/ Документы/
Полемика/рецензии/
Апостасия/ Богословие/
Старостильники/
Богослужение/
Акты
Новомученников/
Новости/ История/
Ссылки/
Гостевая книга/ Персоналии/
|
|
