Тропарь, глас 8. Епископе Павле исповедниче, святителю Коломенский, обличивый прелесть, избиенный Никоном неистовым, обидимым крепкая еси надежда, ты избави и спаси нас, твою светлую память празднующих верно. (Дважды).

Слава, и ныне. Богородичен. Иже нас ради рождейся от Девы и распятие претерпев Благий, испровергий смертию смерть и воскресение явль яко Бог, не презри, ихже созда рукою Своею, яви человеколюбие Свое, Милостиве, приими рождьшую Тя Богородицу, молящуюся за ны, и спаси Спасе наш люди согрешшыя.

Песнь 1, ирмос. Во глубине потопи древле фараонитская вся воиньства, преоружену силу воплощьшееся Слово преспеющия грехи потребило есть, преславный Господь, яко прославися.

Запев: Святыи священномучениче и исповедниче Павле, моли Бога о нас.

Укрепи Христе ума моего силу и даждь ми слово мудрости божественный яко да воспою святителя Павла, Твоего приснаго служителя и угодника.

Ревнуя о Церкви Божии, на соборище дерзнул еси обличити коварства отступник, иже изгнаша тя в заточение, поюща Господеви, яко прославися.

Слава. В день воньже Христос соверши безкровную жертву, в Четверток Великий, ты исповедниче, жив сожжен был еси, яко жертва богоприятная.

И ныне. Херувим и серафим явися славнейши, присно Дево, рождьши Бога Слова паче ума и слова, тем Тя вси вернии ублажаем.

Катавасия: Избави от бед рабы своя, святый священномучениче и исповедниче Павле, яко вси по Бозе к тебе прибегаем, ты бо молиши о нас Христа Бога нашего. Господи помилуй (трижды, с поклонами).

Песнь 3, ирмос. Процвела есть пустыня яко крин, Господи, язычная неплодящая, Церкви пришествием Ти, о ней же утвердися мое сердце.

Святительства саном украшен, богоугодне пожив, и законне пострадав, явился еси необоримое ограждение Церкви, о ней же утвердися мое сердце.

Божественное Евангелие соблюдая, не убоялся еси убивающих тело, и по кончине огненней взыде на небеса сликовствовати со святыми.

Слава. Благими нравы светяся, исполнился еси премудрости и силы духовныя и сияеши славою мучений своих, за нихже приял еси стократное воздаяние.

И ныне. Господь воцарися над языки, в плоть облекся от Тебе Пречистая, спасе их работы вражия, и просвети премудростию евангельскою.

Седален, глас 7. Светлую память твою празднующе, пречудный святителю Христов Павле, молим тя, яко великаго заступника и утешителя, испроси у Христа Бога Церкви единомышления, и нам християном спасение, и велию милость.

Слава, и ныне. Не отлучься недр Бога Отца, непостижимо воплотися от Тебе предвечный Сын Божий на спасение мiра, и Девою сохрани Тя и по Рожестве, Богородице Марие, Его же моли сохранити от стрел греховных и спасти верою Тя славящих.

Песнь 4, ирмос. Пришествовав от Девы, ни ходатай, ни ангел, но Ты Сам Господи воплощься и спасе всего мя человека, тем вопию Ти, слава силе Твоей.

Единство Троицы проповедал еси, Ей же служаше верою и любовию, священномучениче, и ныне молися умирити смущения мiрския, и спасти поющих тя.

Память ти, яко праведнику с похвалами подобает, ты бо праведне пожив от неправеднаго умерщвен, сподобился еси воздаяния от праведнаго Судии.

Слава. Илии ревнителю уподобился еси святителю, обличая заблуждение, и уча не отступати от правыя веры Христовы, ея же ничтоже нужнейши есть.

И ныне. Гору несекомую Богородице, провиде Тя Даниил, от Тебе бо отсечеся не рукама человеческима Камень Христос, Иже сокруши бесовскую лесть, и исполни землю истиною Боговедения.

Песнь 5, ирмос. Ходатай Богу и человеком бысть Христе Боже, Тобою бо Владыко к Светоначальнику Отцу Ти от нощи неведения приведение обретохом.

Светлейши солнца возсия память твоя исповедниче, юже торжествующе, прославляем подвиги твоя, просяще от Христа прияти тобою грехов оставление.

Кто не удивится твоему смирению и мужеству славне, яко на соборе един дерзнул еси обличити злокозненное умышление, не страшася мук и смерти.

Слава. Очистил еси душу свою воздержанием, молитвою и благодатию очисти наша душа от греховных страстей и всяких соблазн молитвами си, священномучениче.

И ныне. Тя едину Богородицу исповедаем, едина бо Ты родила еси Единаго Христа Бога, Ему же молися о всех с верою и любовию призывающих Тя.

Песнь 6, ирмос. В бездне греховней одержим, неизследную милосердия Твоего призываю бездну, от тли Боже мя возведи.

Претерпел еси горькое заточение, беззаконно лишен престола святительскаго, но сподобися предстояния престолу славы Божия со святители и мученики.

Апостольски последовал еси Христу, исповедав Его евангельское учение пред мучителем, не бояся уз, ни темницы, ни смерти святителю Павле.

Слава. Истинному пастырю Христу подобяся, положил еси душу свою за овцы своя, делы и словесы утвердив их не исходити с пажити благочестия.

И ныне. Вси земнороднии да веселятся Пречистая, и да воспевают Тя верных собори, яко родила еси Христа Спаса, Избавителя душам нашим.

Слава, и ныне. Кондак, глас 3. Яко звезда северная, неподвижно сияеши на тверди церковней, являя правило веры, ея же ради пострадал еси, священномучениче Павле, тем Христос дарова тя Церкви Своей наставника и учителя, и всем верным похвалу и утвержение.

Икос. Присносущнаго и немерцаемаго света Христа зрети желая присно, кротко претерпел еси яко агнец мучение от духовнаго волка, облеченнаго пастырскою одеждею, иже не терпя твоея ревности о вере святей, терзаше тя на соборище, и сорва с тебе мантию святую, изгна тя в заточение, идеже мученически скончался еси святителю, сего ради любовию почитаем тя, яко церковнаго учителя, и всем верным похвалу и утвержение.

Прокимен, псалом Давыдов: Честна пред Господем смерть преподобных Его.

Стих: Что воздам Господеви о всех их же воздаст ми.

Всяко дыхание да хвалит Господа.

Хвалите Бога во святых Его, хвалите Его во утвержении сил Его.

Господи помилуй (трижды). Евангелие от Иоанна, зач. 35 (от полу).

Стихера, глас 6. Великая верами любовь к Богу, ею же исполнен был еси, священномучениче Павле,7и дерзновение пред сопротйвными, показа тя твердое основание Церкви Христовы, в ней же торжествующе достодолжно ублажаем тя, и умильно взываем ти: моли о нас единаго Человеколюбца Бога.

Песнь 7, ирмос. Богопротивно веление беззаконнующа мучителя высок пламень вознесло есть, Христос же простер богочестивым детем хлад духовный, Сый благословен и препрославлен.

Не устраши тебе прещение муками и смертию, дерзновенно сопротивляющагося искажению преданий апостольских, и поюща Богови, Сый благословен и препрославлен.

Незыблем столп Церкви показася, ни биение бо, ни раны, ни смерть во огни не возмогоша поколебати тя, взывающа Христови: Сый благословен и препрославлен.

Слава. Оружие обоюдуостро врагом Божиим показа тя ревность твоя священномучениче, ихже ты поразил еси не силою вещественною, но силою Христа Бога, благословенна суща и препрославлена.

И ныне. Низложивый гордыя, и вознесый смиренный Христе, укроти нападающих на ны враг наших, и спаси душа наша молитвами рождьшия Тя.

Песнь 8, ирмос. Пещь огненна иногда в Вавилоне действо разделяше, Божиим велением халдеи опаляющи, верныя же прохлаждающи поюща, благословите вся дела Господня Господа.

Каплюща на землю кровь твоя бысть семенем духовным, от него же израстоша мученик сонмы, и верных множества, иереов и святитель ликостояния поющих: благословите вся дела Господня Господа.

Елико вернии, приидите поклонимся Христу благодаряще, яко такова заступника и молитвенника яви в последняя дни, Павла священномученика, поюще: благословите вся дела Господня Господа.

Слава. Нам чтущим тя любовию, святителю, даруй осталение грехов молитвами си ко Святей Троице, Юже славим во единем существе поюще: благословите вся дела Господня Господа.

И ныне. Имуще Тя Заступницу и Помощницу всесильну, Богородице, молимтися, избави ны от всех злых обстояний, поющих: благословите вся дела Господня Господа.

Песнь 9, ирмос. Безначальна Родителя Сын Бог и Господь, воплощься от Девицы нам явися, омраченныя просветити и собрати расточенныя, тем всехвальную Богородицу величаем.

Тезоименит сый верховному апостолу, подражал еси ему и твердою верою и страдании за слово Божие, с ним же и о нас молися.

Изгнавыи тя неправедне с престола святительскаго, бежа с престола своего, никимже гоним, токмо Божиим изволением, и праведно лишен бысть сана и чести, тебе же прослави Господь яко священномученика.

Слава. Явися великий молитвенник о нас грешных, препроводивый житие, яко святитель истинен, и скончавыйся, яко мученик и исповедник, и ныне торжествует со святыми.

И ныне. Всех премiрных ангельских сил превышши еси, яко рождьшая Сына от Бога Отца, прежде денницы возсиявшаго, Ему же поклоняющеся, Тя прехвальную Богородицу величаем.

  наш адрес: 191014, г. Санкт-Петербург, а-я 8
   e-mail: