МОЛИТВА СВЯЩЕННОМУЧЕНИКА КИПРИЯНА

Господи Боже Сильный и Святый, Царь царствующих, ныне услыши молитву раба Твоего, Киприана.

Тебе предстоит тысяща тысящь и тьма тем Ангел и Архангел, Ты веси тайная сердца раба Твоего (имярек), предстани ему, Господи, яко во узах Павлу и во огне Фекле. Тако, познати ми, Тя, аз бо первый творях вся беззакония моя.

Ты, держах облак, и небо не одождих, древа садовняго и то плод не творих. Непраздным женам не раждати, и иным зачатия не дах. На ограждение вертограда токмо взирах, и не творих. Розге не цвести и класу не прозябати; винограду не родити, и зверем не плождатися. Рыбам морским не плавати и птицам небесным летати возбраних. Тако Ты показал еси силу Свою при пророце Илие.

Молю Тя, Господи Боже мой: вся чародейства, и вся лукавыя бесы ко греху человека клонят и на нем грех творят, Ты силою Своею запрети. Ныне же, Господи Боже мой, Сильный и Великий, благоволивый от недостойнаго, достойному ми быти, и сопричастному Святому Твоему стаду, молю Тя, Господи Боже мой, кто имать молитву сию в дому или при себе, сотвори ему просящее ею.

Пресвятым Величеством Си, милосердовах на мне и не восхоте погубити ми со беззаконии моима: тако не погуби всякаго молящаго Тя молитвою сею.

Непрочнаго в вере утверди. Безсильнаго духом укрепи. Отчаяннаго вразуми и не отверзи всякаго прибегающаго к Твоему Святому имени.

Яже припадая к Тебе, Господи, молю и прошу святое имя Твое: во всяком доме и на всяком месте, наипаче на православном христианине, яже имеется чародейство, кое от лукавых человек или от бесов, да прочтется молитва сия над главою человека или в дому и да разрешится oт связания злыми духи в зависти, лести, ревности, ненависти, злопомнении, злоустрашении, действенном отравлении, от языческаго ядения и от всякаго заклятия и клятвы.

Кто убо стяжав молитву сию во своем дому, да будет соблюден от всякаго ухищрения диавольскаго, потвора, отравы злыми и лукавыми человеки, от заклятий и всякаго колдования и чародеяния, и да бежат от него бесы и да отступят злые дуси.

Господи Боже мой, имеяй власть на небеси и на земли, ради имени Твоего Святаго и ради несказанныя благости Сына Твоего, Бога нашего Иисуса Христа, услыши в час сей недостойнаго раба Твоего (имярек), яже чтет молитву сию и по ней да разрешатся вся диавольския козни.

Яко тает воск от лица огня, тако да погибнут вся чародеяния и заклинания лукавския от лица человека, чтущаго молитву сию. Яко имя Живоначальныя Троицы нам просвещение суть, и разве Тебе, инаго бога не знаем. Тебе веруем, Тебе покланяемся и Тя молим: защити, заступи и сохрани нас, Боже, от всякаго лукаваго действа и чародейства злых человек.

Якоже Моисеовым сыновом из камени сладку воду источил ecи, такожде, Господи Боже Сил, положи руку Свою на раба Твоего (имярек), полную благости Твоея и защити от всякаго кознодейства.

Благослови, Господи, дом в нем же да пребывает молитва сия и всякаго чтущаго память мою. Милость Свою посли ему, Господи, и защити е от всякаго чародеяния. Помощником и покровителем ему буди, Господи.

Четыре реки: Фисон, Геон, Евфрат и Тигр: эдемский человек не может удержати, тако неможет никакой чародей ставления дел или мечтаний бесовских являти пред чтением молитвы сея, заклинаю Богом Живым. Да сокрушится демон и прогонится вся противная и злая сила, пущенная от злых человек на раба Божия (имярек).

Яко умножил лета Иезекию царю, тако умножи и лета имущему молитву сию: службою Ангел, пением Серафимов, благовещением Пресвятыя Девы Марии от Архангела Гавриила и безплотнаго ради зачатия Ея Господа нашего Иисуса Христа, славнаго Рожества Его в Вифлееме, закланием от Ирода царя четыре надесять тысящь младенец и святаго Крещения Его воспринятым во Иордановой реке, постом и искушением еже от диавола, ужасныя Его победы и ужаснейшаго суда Его, ужаснейших чудес Его в мiре бывших: исцеление и очищение даруяй. Мертвых оживляяй, бесы изгоняяй и во Иерусалим вход Его, яко Царя исполняяй: осанна Сыну Давыдову, от младенец вопиющих Ти, слышай. Святыя Страсти, Распятие и Погребение терпя, и иже в третий день Воскресению бысть, якоже писано есть, и на небеса восхождение. Пение тамо многочисленных Ангел и Архангел, славя восход Его, иже одесную Отца сидения до втораго пришествия Его судити живым и мертвым.

Власть дал еси святым учеником Твоим и Апостолом, рекий им: держите и держатся, решите и разрешатся; тако и всякому по молитве сей разреши всякое диавольское чародейство над рабом Твоим (имярек).

Ради бо Святаго Великаго имени Твоего заклинаю и прогоняю вси дуси лукавыя и злыя и очеса злых человек и чародейства их: наговоры, колдовство, глазную порчу, чародеяния и всякое ухищрение диавольское. Mолю Тя, Многомилостиве Господи, отведи от раба Твоего (имярек), и от дому его и от всякаго стяжания его.

Якоже умножил богатство праведному Иову, тако, Господи, умножи домашнее житие, имущему молитву сию: созданием Адамовым, жертвою Авелевою, благовещанием Иосифовым, святостию Еноха, правдою Ноя, обращением Мелхисидека, верою Авраама, святостию Иакова, пророчеством пророков, святынею патриархов, кровию священномучеников, закланием Петра и Павла, детством Моисея, .девством Иоанна Богослова, священством Аарона, действом Иисуса Навина, святостию Самуила, дванадесятью колен Израилевых, молением пророка Елиссея, постом и ведением пророка Даниила, проданием Иосифа прекраснаго, премудростию пророка Соломона, силою ста шестидесяти Ангел, молением честнаго славнаго пророка и Крестителя Иоанна и ста пятидесяти святителей втораго собора, святых исповедников и споручников страшнаго и несказаннаго имени Твоего Святаго, Всеславнаго Всевидца Бога, Емуже предстоят тысяща тысящь и тьма тем Ангел и Архангел. Молитв их ради молю и прошу Тя, Господи, прогоняй и одолевай всяку злобу и лукавство от раба Твоего (имярек) и да бежит оно в тартар.

Молитву сию возношу Единому и Непобедимому Богу, яко да подобает всем человеком православным спасение в дому том, в немже имеется молитва сия, еже писана в семидесяти двух языцех и да разрешится по ней всякое лукавство: или в мори, или при пути, или в источнице, или в кладязе, или в верхнем порозе, или в нижнем, или позади, или спереди, или в стене, или в крове, всюду да разрешится.

Да разрешится всякое диавольское наваждение в ходу, или в стану, или в горах, или в вертепах, или в претворах домовных, или в пропастех земных, или в корене древа, или в листиях растений, или в нивах, или в садах, или в траве, или в кусте, или в пещи, или в бане, да разрешится.

Да разрешится всякое лукавое деяние: или в коже рыбьей, или в плотской, или в коже змеиной, или в коже человеческой, или в украшениях нарядных, или в уборах головных, или в глазах, или в ушах, или в волосах головных, или в бровях, или в постели, или в одежде, или в обрезании ногтей ножных, или в обрезании ногтей ручных, или в крови горячей, или в воде студеной, да разрешится.

Всякое злодеяние и чародеяние да разрешится: или в мозгу, или под мозгом, или в плече, или между плечами, или в мышцех, или в голенех, или в ноге, или в руке, или во чреве, или под чревом, или в костех, или в жилах, или в желудке, или в естественных пределах, да разрешится.

Да разрешится всякое диавольское действо и наваждение содеяное: или на злате, или на сребре, или на меди, или на железе, или в олове, или в свинце, или в меду, или в воске, или в вине, или в пиве, или в хлебе, или в яствах, во всем да разрешится.

Да разрешится всякое злое диавольское умышление противу человека: или в морских гадах, или в летающих насекомых, или в животных, или в птицах, или в звездах, или в луне, или в зверях, или в пресмыкающихся, или в хартиях, или в чернилах, во всем да разрешится.

Аще двух язык лукавых: саламару и ремихару, погоню; елизду и диавола oт раба Божия (имярек), силою Честнаго и Животворящаго Креста Господня со всеми небесными силами, пред Высоким и Страшным Престолом Божиим, творяй слуги Своя огнь палящь, Херувимы и Серафимы, Власти и Престоли, Господьствия и Силы.

Во един час разбойник вниде в рай молитвою. Молитвою помолися Иисус Навин, и солнце ста и луна. Еже помолися пророк Даниил и загради уста львом. Три отроцы: Анания, Азария и Мисаил погаси пламень пещи огненной молитвою. Такожде молю Тя, Господи, по молитве сей даждь всякому молящемуся ей.

Молюся и прошу святаго собора пророческаго: Захарию, Осию, Иессея, Иоиля, Михея, Исайю, Даниила, Иеремию, Амоса, Самуила, Илию, Елиссея, Наума и пророка Предотечу и Крестителя Господня Иоанна; молю и прошу четырех Евангелистов: Матфея, Марка, Луку и Иоанна Богослова, и святых первоверховных Апостолов Петра и Павла, и святых и праведных Богоотец Иоакима и Анну, и Иосифа Обручника, и Иакова брата Господня по плоти, Симеона Богоприимца, и Симеона сродника Господня, и Андрея Христа ради юродиваго, и Иоанна Милостиваго, и Игнатия Богоносца, и священномученика Анания, и Романа певца кондаков, и Марка Греческаго, и Кирилла патриарха Иеросалимскаго, и преподобнаго Ефрема Сирина, и Марка гробокопателя, и триех святителей велицых: Василия Великаго, Григория Богослова, и Иоанна Златоустаго, и иже во святых отец наших святителей Николы Архиепископа Мир Ликийскпх чюдотворца, и святых митрополитов: Петра, Алексия, Ионы, Филиппа, Ермогена Московских чюдотворцев, преподобных Антония, Феодосия и Афанасия Киево-Печерских чюдотворцев, преподобных Сергия и Никона Радонежских чюдотворцев, преподобных Зосиму и Савватия Соловецких чюдотворцев, преподобных Гурия и Варсонофия Казанских чюдотворцев, иже во святых отец наших: Пахомия, Антония, Феодосия, Пимена Великаго, и иже во святых отца нашего Серафима Саровскаго, Сампсопа и Даниила столпников, Максима Грека, великомученика Кирияка и матери его Юлиты, Алексия человека Божия, и святых преподобных жен: мироносицы Марии Магдалыни, Евфросинии, Ксении, Евдокии, Анастасии, святых великомучениц Параскевы, Екатерины, Февронии, Марины, [святых царственных мучеников: Николы царя, Александры царицы, Алексия царевича, Ольги, Татияны, Марии и Анастасии царевен, святых новых священномучеников: Андрея Уфимскаго, Иосифа Петроградскаго, Феодора Волоколамскаго], яже пролиявших кровь свою за Тя, Христа Бога нашего, и всех святых от века Тебе угодивших, Господи, помилуй и спаси раба Твоего (имярек), да не прикоснется к нему, ни к дому его ни кое зло и лукавство ни в вечерний час, ни в утренний, ни во дни, ни в нощи да не прикоснется.

Сохрани его, Господи, от воздушных, тартарных, водяных, лесовых, дворовых и всякаго рода других бесов и духов злобы.

Молю Тя, Господи, яже написася молитва сия святая священномученика Киприяна, утвержена и ознаменована бысть от Святыя Троицы на погубление и прогнание всякаго зла, врага и супостата, бесовских сетей, ловящих всюду человека колдовством и чародейством Садока и Нафаила нарицаемаго Ефил и дщерей Самуилоных, искусных в чародеянии.

Словом Господним утвердися небо и земля и вся яже в поднебесной, силою молитвы сея изгонися всякое вражеское наваждение и потворство.

Призываю в помощь вся силы небесныя и чиноначалия Твоя, Архангелы: Михаила, Гавриила, Рафаила, Уриила, Салафаила, Иегудиила, Варахиила и Ангела хранителя моего; силу Честнаго и Животворящаго Твоего Креста и вся силы и духи небесныя, и будет соблюден раб Твой, Господи, (имярек), и да будет посрамлено лукавство диавольское всею Небесною Силою во славу Тебе, Господи, Создателя моего, и во славу Сына Твоего, Господа нашего Иисуса Христа, всегда ныне и присно и во веки веком. Аминь.

Господи, Ты един Всесильный и Всемогущий, сохрани по молитве священномученика Киприяна раба Твоего (имярек) (трижды).

Господи Иисусе Христе Слове и Сыне Божий, молитвою Пресвятыя Твоея Матери и Ангела хранителя моего, помилуй мя грешнаго раба Твоего (имярек) (трижды).

Вси святии и праведнии, молите Милостиваго Бога о рабе (имярек), да сохранит и помилует мя от всякаго врага и супостата (трижды).